Safaaradda Mareykanka ee Ciraaq ayaa sheegtay in Washington weli si weyn uga walaacsan tahay hawlgallada socda iyo ballaarinta dhuleed ee kooxaha argagixisada Daacish/ISIS iyo Al-Qaacida. Safaaraddu waxay caddeysay in Mareykanku sii mudnaanta siin doono iskaashiga lala yeesho xulafada iyo dalalka gobolka si loola dagaallamo argagixisada.
Warbixin ay soo xigatay Waaxda Arrimaha Ururrada Caalamiga ah ee Wasaaradda Arrimaha Dibadda Mareykanka, oo lagu baahiyey baraha bulshada ee X, ayaa lagu bogaadiyay dalalka xubnaha ka ah Qaramada Midoobay ee sii wadda cadaadiska argagixisada gudaha Ciraaq, Suuriya iyo Soomaaliya. Washington waxay ku tilmaantay in dadaalladaasi ay si muuqata u xaddideen dhaqdhaqaaqyada ISIS ee saddexdaasi dal.
Afhayeenka ciidamada Ciraaq, Sabaax al-Nucmaan, ayaa jawaab ka bixiyay walaacyada Mareykanka, isagoo sheegay in kooxda ISIS “la curyaamiyey” gudaha Ciraaq, isaga oo amaanay feejignaanta ciidamada ammaanka iyo hawlgallada joogtada ah. Wuxuu xusay in xuduudaha dalka si adag loo sugo isla markaana xiisadaha gobolka aysan saameyn toos ah ku yeelan doonin xasilloonida gudaha.
Dhanka kale, safiirka Mareykanka ee Qaramada Midoobay, Dorothy Shea, ayaa Golaha Ammaanka u sheegtay in Washington dardargelisay ololaheeda caalami ah ee ka dhanka ah argagixisada. Waxay tilmaamtay in Mareykanku bartilmaameedsaday hoggaamiyeyaasha, kaabayaasha iyo shabakadaha dhaqaale ee ISIS iyo Al-Qaacida.
Shea ayaa caddeysay in guulo muhiim ah laga gaaray Soomaaliya, Ciraaq iyo Suuriya, iyadoo la dilay qorsheeyayaal weerarro oo ka tirsanaa ISIS. Waxay sidoo kale sheegtay in Mareykanku gacanta ku dhigay ninka lagu eedeeyay qaraxii naftii halliga ahaa ee ka dhacay garoonka Kabul sanadkii 2021, weerar ay sheegatay ISIS oo sababay dhimashada ugu yaraan 13 askari oo Mareykan ah.
Hadalladan ayaa markale xoojinaya sida Soomaaliya ay uga mid tahay meelaha Mareykanku si gaar ah diiradda ugu saarayo la dagaallanka kooxaha argagixisada, maadaama Soomaaliya ay weli martigeliso kooxo xagjir ah oo xiriir la leh ISIS iyo Al-Qaacida. Iskaashiga ka dhexeeya Mareykanka iyo dowladda Soomaaliya, gaar ahaan dhinacyada sirdoonka iyo howlgalada la-dagaallanka argagixisada, ayaa lagu tilmaamay mid xuddun u ah dadaallada caalamiga ah ee lagu xakameynayo faafitaanka fikradaha xagjirka ah ee gobolka Geeska Afrika.
