Machadka Qaahira ee Nabadda, Halganka iyo Tababarka (CCCPA) ayaa ku dhawaaqay in si guul leh loo soo gabagabeeyay tababar ballaaran oo markii ugu horreysay loo qabtay cutubyo ka tirsan ciidamada qalabka sida ee Masar, kuwaas oo loo diyaarinayo ka qeybgalka hawlgalka cusub ee Midowga Afrika ee Soomaaliya (AUSSOM).
Tababarkan oo lagu qabtay magaalada Qaahira ayaa waxaa si wadajir ah u qabanqaabiyay CCCPA iyo Wasaaradda Gaashaandhigga Masar, halka dowladda Japan ay bixisay taageero dhaqaale iyo farsamo, taas oo qayb weyn ka qaadatay hirgelinta howlaha.
Hawlgalka AUSSOM, oo lagu beddelayo hawlgalka hore ee ATMIS, ayaa diiradda saaraya dhismaha awoodaha amni ee Soomaaliya, taageeridda ciidamada qaranka iyo hubinta in kala guurka amni uu noqdo mid deggan oo guul leh.
Saraakiil ka tirsan CCCPA ayaa sheegay in tababarku uu xooga saaray xirfadaha ilaalinta nabadda, iskaashiga caalamiga ah iyo la qabsiga xaaladaha adag ee gudaha Soomaaliya. Cutubyada la tababaray ayaa lagu wadaa in dhawaan loo diyaariyo ka qeybgalka hawlgalka Midowga Afrika ee Soomaaliya.
Masar ayaa noqotay dal kaalin muuqata ka qaadanaya sugidda amniga Soomaaliya, iyadoo tababarkaasi uu astaan u yahay diyaarinta ciidamadeeda ka hor inta aan loo dirin goobta hawlgalka. Qaahira iyo Muqdisho waxaa ka dhexeeya xiriir taariikhi ah oo dhinacyo badan ah, waxaana marar badan Masar ay la garab istaagtay Soomaaliya dhanka siyaasadda, waxbarashada iyo nabadgelyada.
Khabiir ku takhasusay arrimaha amniga gobolka ayaa sheegay in ka qeybgalka Masar ee AUSSOM uu muujinayo sida dalalka Carabta iyo Afrika ay ugu midoobayaan taageerada Soomaaliya, taas oo gacan ka geysan karta xasilloonida guud ee Geeska Afrika.
Qaramada Midoobeey iyo hay’adaha caalamiga ah ee taageera nabadgelyada Soomaaliya ayaa sii xoojinaya dadaallada lagu dhisayo awoodaha ciidan ee gudaha, iyadoo la filayo in AUSSOM uu noqdo wajiga cusub ee iskaashi caalami ah oo lagu taageerayo Soomaaliya si ay u gaarto amni waara iyo dowladnimo xooggan.
