Xaaladda Itoobiya gaar ahaan gobolka Tigray ayaa mar kale noqotay mid walaac abuurtay, iyadoo dib loo xusuusanayo dhacdooyinkii murugada lahaa ee 2020-kii, markii dagaalku sababay dhimashada in ka badan 600,000 qof iyo barakicinta malaayiin kale.
Inkasta oo heshiiskii nabadeed ee Pretoria ee 2022 loo arkayay in uu soo afjari doono colaaddii, haddana khilaafaadka siyaasadeed iyo is-aaminaad la’aanta dhinacyada ayaa sii hurinaya xiisadda. TPLF weli hubka ma aysan dhigin, halka dowladda federaalku ku eedeysay in aysan fulin heshiiska, isla markaana ay taageero ka helayso Eritrea.
Arrinta ugu weyn ee walaaca dhalisay waa muranka ka dhashay hadalladii Ra’iisul Wasaare Abiy Axmed ee ahaa in Itoobiya “baahi jiritaan” u qabto marin badeed. Eritrea ayaa taas u aragtay hanjabaad toos ah, waxayna bilowday diyaarin ciidan iyo dhaqdhaqaaqyo xuduudeed.
Gobolka Tigray-na waxa wali ka taagan khilaaf siyaasadeed oo u dhexeeya hoggaamiyeyaasha TPLF iyo Amxaarada ku sugan dhulka muranka badan ee galbeedka Tigray. Taasi waxay sii kordhisay cabsi dagaal, iyadoo dad badan ay markale ka qaxayaan guryahooda.
Khubarada arrimaha gobolka ayaa ku boorriyay dhinacyada in laga shaqeeyo xal siyaasadeed iyo wadahadal dhab ah. Waxay ku digeen in dagaal kale oo qarxa uu noqon doono mid burbur hor leh ku rida Itoobiya iyo guud ahaan Geeska Afrika.
