Madaxweynaha Kenya, William Ruto, iyo Madaxweynaha Soomaaliya, Xasan Sheekh Maxamuud ayaa lagu arkay iyagoo adeegsanaya gaari noociisu aad u gaar yahay oo qiimihiisu gaarayo kumanaan doollar, xilli ay wada qaadanayeen kulan heer sare ah oo si weyn u soo jiitay indhaha shacabka.
Madaxweyne Ruto ayaa dhiggiisa Soomaaliya ku qaabilay hoygiisa ku yaalla Kilgoris, isaga oo si shaqsi ah uga soo qaaday goobtii ay ka degtay diyaaradda qumaatiga u kacda (helicopter-ka) ee madaxweynaha Soomaaliya, kuna geeyay gurigiisa.
Si kastaba ha ahaatee, dareenka dadweynaha ayaa si degdeg ah ugu jeestay gaariga ay adeegsadeen labada hoggaamiye, iyadoo dad badan ay is weydiiyeen noociisa, awooddiisa iyo qiimihiisa.
Gaariga ayaa la xaqiijiyay inuu yahay Polaris XPEDITION XP 5 ee sannadka 2024, kaas oo ah gaari shan kursi leh oo loogu talagalay safarrada dhulalka adag, shaqooyinka bannaanka iyo sahaminta goobaha fogfog. Sida lagu sheegay xogta shirkadaha iibiya, gaarigan ayaa lagu qiyaasaa inuu ku kacayo ku dhowaad $32,999, oo u dhiganta in ka badan 4.2 milyan oo shilin Kenya ah.
Polaris XPEDITION XP 5 waxa ku shaqeeya matoor noociisu yahay 999cc ProStar 1000 Gen 2, kaas oo soo saara awood dhan 114 horsepower, taas oo siinaysa xawaare iyo awood sare.
Gaarigu waxa uu leeyahay nidaamyo kala duwan oo wadis ah, oo ay ku jiraan laba-taayir (2WD), afar-taayir (AWD) iyo habka VersaTrac Turf Mode, kuwaas oo u saamaxaya inuu si fudud ugu shaqeeyo dhulalka kala duwan, laga bilaabo buuraha dhagaxda leh ilaa dhulka bannaan.
Maadaama deegaanka Narok uu caan ku yahay dhulalka adag, noocan gaari ah ayaa si weyn ugu habboon socodka iyo isu socodka halkaas.
Gaarigan oo si otomaatig ah u shaqeeya ayaa isticmaala nidaamka Electronic Fuel Injection (EFI), wuxuuna qaadaa shidaal gaaraya 47.3 litir. Sidoo kale wuxuu jiidi karaa culays dhan 907 kiiloogaraam, halka qaybta dambe ee xamuulka lagu qaado ay qaadi karto ilaa 600 rodol.
Dhanka farsamada casriga ah, gaariga waxa ku rakiban shaashad taabasho ah oo cabbirkeedu yahay 7-inch RIDE COMMAND, nidaamka hagista GPS-ka, kamarad gadaal laga daawado, cod-baahiyaha JBL Trail Pro, iyo isteerinka korontada ku shaqeeya. Sidoo kale waxa uu taageeraa adeegyada la socodka fog iyo maaraynta xogta gaariga.
Wararku waxay sheegayaan in gaarigan uu aad ugu yar yahay gudaha Kenya, iyadoo la rumeysan yahay in ay dalka ku haysto tiro kooban oo keliya. Ilaa hadda ma jiro diiwaan dadweyne oo muujinaya tirada saxda ah ee gaadiidkan laga leeyahay dalka.
Sidoo kale, waxa jira hal wakiil oo rasmi ah oo iibinta gaadhigan u qaabilsan Kenya iyo guud ahaan Bariga Afrika, kaas oo xaruntiisu ku taallo magaalada Malindi.
