Ra’iisul Wasaare Ku-xigeenka Soomaaliya, Saalax Axmed Jaamac, ayaa Talaadadii furay shir looga hadlayo dib-u-eegista Istaraatiijiyadda Qaranka ee Is-dhexgalka Gobolka, taas oo diiradda lagu saarayo xoojinta xiriirrada dhaqaale, ganacsi iyo kaabeyaasha isku xira Soomaaliya iyo dalalka gobolka.
Shirka waxaa ka qeyb galay wasiirro ka tirsan Dowladda Federaalka, mas’uuliyiin dowladeed iyo khubaro farsamo, kuwaas oo ka wada hadlay sidii loo dardargelin lahaa is-dhexgalka dhaqaale ee gobolka, loona ballaarin lahaa doorka Soomaaliya ee ganacsiga gobolka.
Ra’iisul Wasaare Ku-xigeenka ayaa sheegay in Afrika ay si xawli ah ugu soo baxeyso mid ka mid ah suuqyada waaweyn ee caalamka, iyadoo dalal badan oo ka baxsan qaaradda ay sii kordhinayaan danahooda ganacsi ee Afrika.
Waxa uu xusay in Soomaaliya ay leedahay fursad gaar ah oo ay kaga mid noqon karto buundada isku xirta Afrika iyo caalamka, gaar ahaan marka la eego xeebteeda dheer oo ka mid ah xeebaha ugu dhaadheer qaaradda Afrika.
Saalax Axmed Jaamac ayaa sidoo kale tilmaamay in caqabadaha ugu waaweyn ee Afrika ay ka mid tahay isku-dhafka dhaqaale oo xaddidan, taas oo keentay in ganacsiga qaaradda uu weli ka hooseeyo awooddiisa dhabta ah.
Waxa uu ku baaqay in la diyaariyo istaraatiijiyad ku saleysan cilmi-baaris iyo xog dhab ah, si Soomaaliya iyo shacabkeedu uga faa’iideystaan fursadaha ka dhalan kara is-dhexgal dhaqaale oo ballaaran.
Istaraatiijiyadda cusub ayaa lagu wadaa inay qeexdo habka Soomaaliya si wanaagsan uga faa’iideysan karto waddooyinka ganacsiga, dekedaha iyo goobaha xuduudaha, si loo fududeeyo isu-socodka badeecadaha, loo ballaariyo suuqyada loona soo jiito maalgashi.
Sidoo kale, istaraatiijiyaddu waxay xoojin doontaa xiriirrada dhaqaale ee Soomaaliya la leedahay Geeska Afrika, Bariga Afrika iyo guud ahaan qaaradda Afrika.
